Бүгін қазақ әдебиетінің көрнекті өкілі, Халық жазушысы Мұхтар Мағауин 85 жасында дүниеден озды. Оның шығармашылығы мен өмірі қазақ әдебиетінде ерекше орын алады.
Мұхтар Мағауин 1940 жылы 2 ақпанда Шығыс Қазақстан облысының Аягөз ауданында дүниеге келген. Жазушы, әдебиеттанушы, филология ғылымдарының докторы, Қазақ КСР Мемлекеттік сыйлығының лауреаты (1984) және Қазақстанның халық жазушысы (1996) атанған. Ол 1962 жылы Қазақ мемлекеттік университетінің филология факультетін бітірген соң, әдебиет саласында еңбек жолын бастады. «Қазақ әдебиеті» газетінде бөлім меңгерушісі, «Жазушы» баспасында бас редактордың орынбасары, сондай-ақ, Қазақ КСР Ғылым академиясының М.Әуезов атындағы Әдебиет және өнер институтында аға ғылыми қызметкер болды.
Мағауиннің алғашқы әңгімелері 1960-1961 жылдары жарық көрді. Оның шығармашылығы қазақ әдебиетінің дамуына үлкен үлес қосты. Жазушының танымал еңбектерінің қатарында «Көк мұнар», «Аласапыран» тарихи роман-дилогиясы, «Сары қазақ» романы, «Мен» мемуарлық дилогиясы және «Шыңғыс хан және оның заманы» тарихи деректі тетралогиясы бар.
Мұхтар Мағауиннің шығармашылығы қазақ халқының тарихын, мәдениетін және рухани құндылықтарын терең зерттеуге негізделген. Оның еңбектері әдебиет сүйер қауымға үлкен әсер етіп, ұрпақтан-ұрпаққа жалғасатын мұра болып қалары сөзсіз.
